तातोपानीमा नुहाउन भनेर शुक्रबार दिउँसो घरबाट हिडेका श्रीमान्को सेती नदीको बाढिमा परेर मृत्यु भएका जग बहादुरको अर्ध शव अगाडी आइतबार दिउँसो शोक गर्दै चुनदेवी ।

समुन्द्र पौडेल

सुनसान म्याग्दी टोलमा मान्छेको चहलपहल बढ्न थाल्यो । केही क्षणमा लामा भनेर चिनेने जग बहादुरको घरमा मान्छे झुम्मिन थाले । उनको ३ कोठे घर भित्र उनकी श्रीमती चुनदेवी न्याउरो अनुहार लगाएर बसेकी थिइन् । दुई छेउमा बसेका थिए, उनका २ छोरी ।

मृतक जग बहादुर पुनः

केही क्षण नवित्दै ‘नौ दिनमा फर्किन्छु’ भन्दै कास्की सार्दीखोलाको तातोपानीमा डुब्न गएका जंग बहादुरको अर्ध शरिर (कम्मरमाथी) को शव २ दिनमै घरको आगनमा आइपुग्यो । सेतीको हिउँ पहिरोमा श्रीमान् वेपत्ता भएको खबर सुने लगतै २ दिनदेखी भोकोपेटमा बसेकी चुनदेवी शव आडैमा बर्बराउन थालिन् । ‘यी छोराछोरीलाई कसरी पाल्ने ?’ उनी बर्बराउँदै थिइन, ‘सोच्दै नसोचेको हामीलाई छाडेर कहाँ जानुभयो ?’

 लेखनाथ नगरपालिका–१३, तल्लो गगनगौडाको म्याग्दी गाउँमा बसोबास गर्दै आएका जग बहादुर सहित १२ जनाको समुह तातोपानीमा स्नान गर्न शुक्रबार बिहान ११ बजे घरबाट हिडेका थिए । म्याग्दे टोलका उनीहरुसंगै तनहुँ दुलेगौडा एक्लेफाटका हरिकला छन्त्याल पनि सहभागी थिइन् ।

हिम बाढिमा परेर सोही समुहमा सहभागि जग बहादुर, तिर्थकुमारी, दल बहादुर पुनः र हरिकला छन्त्यालको शब फेला परिसकेको छ । दल बहादुरकी श्रीमती तिलीसरा पुन, ३ वर्षिय छोरा लेसन, कृष्णकुमारी मगर र जग बहादुरकी सासु जमुना अझै हराई रहेका छन् । 

भारतीय सेनामा कार्यरत छदाँ बस दुर्घटनामा परेर ढाडँ भाचिएका जग बहादुर ढाङ र घुडाँ दुखेपछि तातोपानीमा डुबुल्न गएका थिए । गाउँमा मजदुरी गर्दै आएका अन्यमा समेत

मृतक तिर्थकुमारी छन्त्याल

ढाड दुख्ने र घुँडा दुख्ने समस्याबाट पीडित थिए । उनीहरु हरेक वर्ष तातोपानीमा नुहाउन जाने गरेका थिए ।

एैसेलु खान वनमा जादाँ  जोगिएका  गौमाया र अनिशा ।

अहिले म्याग्दी टोल शोकमा डुबेको छ । सबै गाउँलेको आँखा रसाएका छन् । कृष्णकुमारीको छोरी ५ वर्षिया श्रृष्टि घरमा नयाँ मान्छे आउँदा टोलाउछिन् । मृतक तिर्थ कुमारीकी ७ वर्षिया छोरी अनिशा छन्त्याल र बहिनी १२ वर्षिया गौमाया घटना सम्झदाँ पनि झस्कन्छन् ।
एैसेलु खान तुल बहादुर (गौमायाको दाई) संग तातोपानी माथीको वनमा गएका कारण उनीहरु बाढि बाट जोगिएका थिए । तातोपानी गएका रण बहादुरको परिवारका ५ मध्ये ४ सकुशल छन् ।

सेती नदीको बाढिमा ज्यान गुमाएका जग बहादुरको शव घरमा आउनु अघि श्रीमती चुनदेवी र दुई छोरी ।