इ तनहुँ संवाददाता

काठमाडौं, पुस २ 

पत्रकार किशोर नेपालको तेस्रो उपन्यास 'शहरको कथा' शुक्रबार राजधानीमा साहित्यकार डिपी भण्डारीले सार्वजनिक गरे। समारोहमा बोल्दै प्राध्यापक भण्डारीले 'पत्रकारितामा निर्भीक छवि बनाइसकेका नेपालले साहित्यमा पनि राम्रो लेखकको छवि बनाएको' टिप्पणी गरे। उपन्यासमा नेपालको आधुनिक, साहसिक र पारदर्शी समाजको सफल चित्रण रहेको उनले बताए । 

उपन्यास लेखनबारे बोल्दै नेपालले चरित्रचित्रण र कथानक निर्माणमा आफू समाजकेन्द्रित बनेको बताए। उपन्यास पत्रकारिताको सरल भाषामा लेख्ने प्रयास गरेको र यसमा अनुभव र कल्पनाको संगम रहेको उनले बताए। 'यो उपन्यासमा केही अराजकता पनि झल्कनसक्छ। तर, त्यो अराजकता मेरो होइन, अहिलेको शहरको हो,' उनले भने।

शहर पसेकी एक युवती अरोजाको महत्त्वाकांक्षाकेन्द्रित एक सय ९५ पृष्ठको उपन्यास न्यु थट पब्लिकेसनले बजारमा ल्याएको हो।