(एजेन्सी) बेलेम, असोज १३ युवा खेलाडीद्धय लुकास र नेइमारले गोल गरेपछि बुधबार दक्षिण अमेरिकाका दुई चिर प्रतिद्धन्दीबीच सम्पन्न अन्तर्राष्ट्रिय मैत्रिपुर्ण खेलमा ब्राजिलले अर्जेन्टिनामाथि २-० को विजय हासिल गरेको छ।घरेलु क्लबमै व्यावसायिक फुटबल खेलिरहेका खेलाडीहरु मात्र समेटिएको खेलमा पाएको यो जितपछि ब्राजिलले दुई टोलीबीचको श्रंखला कव्जा जमाएको छ। अर्जेन्टिनाको कोर्डोबामा सम्पन्न पहिलो लेग गोलरहित बराबरीमा टुंगिएको थियो। लुकासले ५४ औ मिनेटमा खोलेको ब्राजिलको खातामा नेइमारले समय सकिन १५ मिनेट बाँकी रहँदा अर्को गोल थपेका थिए। 'हामी फेरि आफ्ना समर्थकलाई यो अपार खुसी दिन सफल भएका छौ। समर्थकलाई खुसी पार्न सकेकोमा सायद आज हामी सवैभन्दा खुसी छौ,' नेइमारले भने, 'यो जित साच्चै निकै भावनात्मक र महत्वपूर्ण रह्यो।'