जुट्दैछ सहयोग महासंघ भवनलाई

इ तनहुँ संवाददाता
तनहुँ, २२ वैशाख 
    नेपाल पत्रकार महासंघ तनहुँ शाखा आफ्नो भवन निर्माण कार्यमा जुटेको छ । भवन निर्माणका लागि विभिन्न व्यक्ति तथा संघसंस्थाले चासो दिएका छन् । सम्पूर्ण पत्रकारहरुको छाता संगठन पत्रकार महासंघको भवन बनाउन आर्थिक सहयोग जुट्ने क्रम जारी रहेको छ ।
    वर्षौको आन्दोलनपछि जिल्ला विकास समितिले गत वर्षको जिल्लापरिषद्बाट महासंघको भवन निर्माणको लागि व्यास नपा–२ स्थित करिब २ आना जग्गा छुट्याएको थियो । उक्त जग्गामा अहिले २ तले भवन बनाउन महासंघ अग्रसर भइरहेको छ । २ तले भवन बनाउन करिब ३२ लाख रुपैयाँ लाग्ने महासंघ तनहुँका अध्यक्ष प्रेमप्रसाद पौडेल बताउँछन् ।
     महासंघको भवन निर्माणका लागि विभिन्न संघसंस्था तथा व्यक्तिहरुले सहयोग गरिरहेका छन् । बन्दिपुरका पर्यटन व्यवसायी सन्तकुमार श्रेष्ठले १० हजार रुपैयाँ सहयोग गरेर सुरु भएको अभियानमा नागरिक सचेतना सञ्जाल तनहुँले १० हजार, तनहुँ घर भै अष्ट्रेलियामा रहेका सागर लोहनीले १४ हजार ३ सय ३६, दमौलीमा रहेको व्यास बचत तथा ऋण सहकारी संस्था लि. ले २० हजार, व्यास–११ निवासी श्याम मौरातीले १५ हजार १ सय रुपैयाँ सहयोग गरिसकेका छन् ।
    ‘महासंघको भवन निर्माणका लागि अन्य व्यक्ति तथा संघसंस्थाले समेत चासो दिएका छन्,’ भवन निर्माण समितिका संयोजक एवं महासंघ तनहुँका अध्यक्ष पौडेलले भने, ‘छिट्टै भवन निर्माणको कार्य थालनी गर्नेछौं ।’ उनका अनुसार हालसम्म भवन निर्माणका लागि ५ लाख ६९ हजार ४ सय ३६ रुपैयाँ संकलन भइसकेको छ ।
    देश तथा विदेशमा रहेका शुभेच्छुकहरुले समेत महासंघको भवन निर्माणका लागि चासो दिएको आर्थिक समितिका संयोजक एवं महासंघका निवर्तमान अध्यक्ष प्रदीप काफ्लेले बताए । ‘फेसबुक मार्फत् विदेशमा रहेका नेपालीहरुले भवन निर्माणका लागि चासो देखाएका छन्,’ काफ्लेले भने ।
विदेशमा रहेका नेपालीहरुले पत्रकार महासंघको भवन निर्माणका लागि चासो देखाउनु सराहनीय भएको काफ्लेको भनाई छ । रकम संकलन अभियानलाई जिल्लामा समेत सञ्चालन गरिने उनले बताए । ‘जिल्लाका विभिन्न व्यक्ति तथा संघसंस्थामा अभियान चलाउनेछौं,’ उनले भने ।

यदि तपाईहरु कोही महासंघ तनहुँको भवन निर्माणका लागि सहयोग गर्न चाहुनुहन्छ भने सम्पर्क राख्नुहोला । महासंघको यो अभियानलाई सफल पार्न देश/विदेशमा रहनुहुने नेपालीहरुले सहयोग गर्नुहुनेछ भन्ने आशा राखेका छौं ।
सम्पर्क:
प्रेमप्रसाद पौडेल : अध्यक्ष, नेपाल पत्रकार महासंघ तनहुँ शाखा (९८४६०६५१४६) prem.paudelg@gmail.com
प्रदीप काफ्ले : आर्थिक संयोजक समिति (९८४६०४०४३२) kaphlep@gmail.com
समुन्द्र पौडेल : सहसचिव, नेपाल पत्रकार महासंघ तनहुँ शाखा (९८४६०४६८३०)samundrapoudel@gmail.com
कृष्ण न्यौपाने : सदस्य, नेपाल पत्रकार महासंघ तनहुँ शाखा (९८५६०६०४१४) krishnadml@gmail.com

Labels: तनहुँ समाचार