शान्तिवर्षको रजत जयन्ती आज

इ तनहुँ संवाददाता 
दमौली, ७ फागुन
    व्यास नपा–८ चापाघाटमा सञ्चालित शान्ति वर्ष अंग्रेजी विद्यालयले आज विविध कार्यक्रमका साथ रजत जयन्ती मनाउने भएको छ । रजत जयन्ती समारोहको पूर्व शिक्षा मन्त्री एवं नेपाली कांग्रेसका नेता गोविन्दराज जोशीले उद्घाटन गर्ने कार्यक्रम रहेको छ । सो अवसरमा विभिन्न कार्यक्रमहरु समेत आयोजना गरिने विद्यालयले जनाएको छ ।
    विद्यालयको रजत जयन्तीकै अवसरमा शुक्रबार रक्तदान कार्यक्रम सम्पन्न भएको छ । विद्यालयका प्रिन्सिपल ठाकुरप्रसाद कैनीले रक्तदान गरी कार्यक्रमको शुभारम्भ गरेका थिए । कार्यक्रम विद्यालय सञ्चालक समितिका अध्यक्ष वृषराज श्रेष्ठको अध्यक्षतामा सम्पन्न भएको थियो । कार्यक्रममा १९ जनाले रक्तदान गरेका थिए । कार्यक्रम नेपाल रेडक्रस सोसाइटी कास्की शाखाको सहयोगमा सम्पन्न भएको थियो ।
    त्यस्तै रजत जयन्तीकै अवसरमा शनिबार सरसफाई कार्यक्रम सम्पन्न भएको छ । कक्षा ६ देखि १० कक्षा सम्मको विद्यार्थीहरुले चापाघाटदेखि साँगे पुलसम्म सरसफाई गरेका थिए ।

Labels: तनहुँ समाचार