बुटवल, मङ्सिर १२ 

रुपन्देहीको सालझण्डीमा सोमबार अपरान्ह भएको सडक दुर्घटनामा कारोवार दैनिकका समाचार सम्पादक विजयवावु खत्रीको मृत्यु भएको छ । नेपालगञ्जबाट काठमाडौं जाँदै गरेको बा ४ च ५४२ नम्बरको स्कारपियो गाडी सालझण्डीमा दुर्घटना हुँदा खत्रीको मृत्यु भएको हो । दुघटनामा अन्य ५ घाइते भएका छन् ।

सडकमा विपरीत दिशाबाट आइरहेको साइकललाई जोगाउने क्रममा अपरान्ह ४ बजेतिर दुर्घटना भएको हो। दुर्घटनापछि गम्भीर घाइते ३५ वर्षीय खत्रीको लुम्विनी अञ्चल अस्पतालमा उपचार हुँदाहुँदै मृत्यु भएको प्रहरीले जनाएको छ ।

साइकलयात्री रुपन्देहीको सालझण्डीका पूर्णवासी थारुको घटनास्थलमै मृत्यु भएको इलाका प्रहरी कार्यालय सालझण्डीले जनाएको छ। साइकलयात्रीलाई जोगाउन खोज्दा तीब्र गतिको गाडी सडक किनारमा गुल्टिएको थियो।

दुर्घटनामा गाडीमा सवार कारोवार दैनिकमा कार्यरत पत्रकार राधिका ढकाल, डीआर आचार्य लिला घिमिरे र प्रकट कुमार शिशिर तथा वितरण प्रमुख युवराज कार्की घाइते भएका छन्। घाइतेमध्ये डीआर आचार्यको अवस्था गम्भीर छ। उनको छातीमा समस्या देखिएको लुम्विनी अञ्चल अस्पताल बुटवलमा उपचारमा संलग्न डाक्टरहरुले बताएका छन्। घाइते सबैलाई थप उपचारको लागि लुम्विनी अञ्चल अस्पतालले युनिभर्सल मेडिकल कलेज भैरहवामा रिपर गरेको छ। दुर्घटनापछि गाडी चालक फरार रहेको प्रहरीले जनाएको छ। निधन भएका खत्रीको शवको पोस्टमार्टमको लागि लुम्विनी अञ्चल अस्पताल शवगृहमा राखिएको छ।