शिव शर्मा

कास्की, कार्तिक २३ - त्रिभुवन आर्मी क्लबले सफल पोखरा कपको उद्घाटन खेलमा मंगलबार विजय सुरुआत गरेको छ । आर्मीले जावलाखेल युथ क्लबलाई पोखरा रंगशालामा २-१ ले हरायो ।

अघिल्लो वर्ष बुटवलमा भएको तिलोत्तमा गोल्डकपमा आर्मीलाई हराएको जावलाखेलले पुरानो प्रदर्शन दोहोर्‍याउन सकेन । तिलोत्तमासँगै बि्रटिस कपमा समेत हार बेहोरेको आर्मीले पोखरा मैदानमा त्यसको बदला लिन सफल भयो । आफ्ना सबै पुराना खेलाडीको दबदबा रहँदा पनि जावलाखेलले आर्मीसँग चित्तबुझ्दो खेल पस्कन सकेन ।

जावलाखेलको कमजोर प्रदर्शनको फाइदा उठाउँदै आर्मीले सुरुदेखि नै दबाब कायम गरेको थियो । पहिलो हाफको अन्तिम मिनेटमा आर्मीले अग्रता लियो । खेलको ४४ औं मिनेटमा विपक्षी दुई खेलाडीलाई छल्दै आर्मीका नवयुग श्रेष्ठले अग्रता दिलाए । श्रेष्ठको प्रहार विपक्षी गोलकिपरले बचाउने मौका पाएनन् । खेलमा आर्मीका खेलाडी बीच देखिएको तालमेलले जावलाखेलको डिफेन्सलाई रोक्न निकै गाह्रो परेको थियो ।

एक गोल गरेपछि हौसिएको आर्मीले दोस्रो हाफमा थप आक्रामक खेल प्रस्तुत गर्‍यो । खेलको ६६ औं मिनेटमा आर्मीका हरि महतोले अर्को गोल गरे । आफ्ना सहकर्मी सन्तोष बस्नेतले हानेको प|mी-किकलाई विपक्षी गोलकिपरले बचाउ नगरेपछि टेकबहादुरले मिलाएको बललाई महतोले गोलमा परिणत गरे ।

थुप्रै मौका पाएर पनि गोल गर्न नसकेको जावलाखेलले २४ औं मिनेटमा पाएको पेनाल्टी अवसर पनि सदुपयोग गर्न सकेन । आर्मीका गोलकिपरले जावलाखेलका विशाल राईलाई लडाएपछि पेनाल्टी मौका पाएको थियो । पहिलो हाफमा गोल गर्न नसकेको जावलखेलले दोस्रो हाफको ७९ औं मिनेटमा एक गोल गर्ने मौका पाएको थियो । विशाल राईले मिलाएको पासलाई कर्ण लिम्बूले गोलपोस्ट नजिकैबाट गोल गरेका थिए । गोल हान्ने थुप्रै मौका पाएर पनि जावलाखेलको फितलो प्रहारले अवसर चुकेको थियो ।

आर्मीले जित हासिल गरे पनि चित्तबुझ्दो खेल आफ्ना खेलाडीले प्रदर्शन गर्न नसकेको प्रशिक्षक योगम्बर सुवालले बताए । 'खेलाडीले प्रशिक्षणमा जस्तै खेल प्रदर्शन गर्न सकेनन्, सुवालले भने, 'अर्को खेलमा अझै धेरै मिहिनेत गर्नुपर्ने देखिन्छ ।'

जावलाखेलका प्रशिक्षक किशोर केसीले पेनाल्टीको मौका गुमाएपछि आफ्ना खेलाडीको मनोबल गिरेको बताए । 'पेनाल्टीमा गोल गर्न नसकेपछि खेलाडी नर्भस भए,' उनले भने, 'गोल गर्ने धेरै अवसर पनि गुम्यो ।'

पूर्व राष्ट्रिय खेलाडीको सन्यास पोखरामा रहेर राष्ट्रिय तथा अन्तर्राष्ट्रिय फुटबल प्रतियोगितामा सहभागी भएका ईश्वर गुरुङ (चन्द्र) ले खेल जीवनबाट सन्यास लिएको घोषणा मंगलबार गरेका छन् ।

घोषणा कार्यक्रममा उनलाई एन्फाका अध्यक्ष गणेश थापाले खेलकुदमा पुर्‍याएको योगदानको कदर गर्दै सम्मान गरे । source:eknatipur.com